IP/09/276
Brussell, it-18 ta' Frar 2009Il-hotline tal-UE 116000 għat-tfal
mitlufin bdiet taħdem f’ħames Stati MembriSentejn
ilu, il-Kummissjoni Ewropea rriżervat il-116000 bħala l-hotline komuni
għat-tfal mitlufin (IP/07/188)
għall-UE kollha kemm hi, u appellat lill-Istati Membri biex jadottawh u
jimplimentawh. Filwaqt li s-sena l-oħra in-numru kien qed jaħdem biss
fl-Ungerija (IP/08/1129),
wara appelli ripetuti mill-Kummissjoni, illum l-Istati Membri kollha tal-UE
għamlu mezz li n-numru jkun pubblikament disponibbli għall-fornituri
tal-hotline. In-numru ġie assenjat ukoll lil fornituri tas-servizzi
f’disa’ Stati Membri, meta mqabbla ma’ sebgħa, is-sena
l-oħra. Il-116000 huwa servizz li issa jaħdem f’ħames
pajjiżi (il-Greċja, l-Ungerija, l-Olanda, il-Portugall u r-Rumanija). 
Dalwaqt se jibda jopera wkoll f’żewġ pajjiżi oħra
(il-Belġju u s-Slovakkja). Wara li ssorveljat mill-qrib il-passi li
ttieħdu biex l-116000 jiġi rriservat mill-Pajjiżi tal-UE, kif
meħtieġ skont il-liġi tal-UE, il-Kummissjoni għal
darb’oħra tappella biex l-Istati Membri jappoġġaw u
jiggwidaw operaturi potenzjali tal-hotline 116000 sabiex il-ġenituri u
t-tfal ikunu jistgħu jċemplu dan in-numru meta jeħtieġuh,
ikunu fejn ikunu fl-Ewropa.
“Hija aħbar tajba li l-hotline għat-tfal mitlufin 116000
issa qiegħed jaħdem fil-Greċja, l-Ungerija, l-Olanda,
il-Portugall u r-Rumanija. Madankollu, kont nistenna li Stati Membri oħra
jieħdu approċċ aktar ambizzjuż. La hemm lok u lanqas
ħin għall-kompjaċenza fejn tidħol is-sikurezza ta'
uliedna," qalet Viviane Reding, il-Kummissarju tal-UE
għat-Telekomunikazzjoni. “Qiegħda nappella lill-Istati Membri
biex jerfgħu ir-responsabbiltajiet tagħhom u jinfurmaw lill-fornituri
tas-servizzi dwar id-disponibbiltà tan-numru 116 sabiex inkunu nistgħu
nibdew inħaddmu dawn il-hotlines madwar l-UE kollha kemm hi. Lil hinn
mill-obbligi legali – li se nibqa’ ninforza bis-saħħa
– jeżisti obbligu morali lejn il-ġenituri u t-tfal
Ewropej.”
Illum, il-hotline tal-UE 116000 għat-tfal mitlufin jaħdem
f’ħames pajjiżi tal-UE (il-Greċja, l-Ungerija,
l-Olanda, il-Portugall u r-Rumanija).  F’dawn il-pajjiżi, in-numru
ġie assenjat għal fornituri tas-servizzi li jkollhom ikunu kapaċi
jittrattaw it-telefonati kif xieraq, b’xejn, 24 siegħa, sebat ijiem
fil-ġimgħa, madwar il-pajjiż kollu. Fl-Ungerija,
mill-introduzzjoni tal-116000 ‘l hawn, kien hemm madwar 40,000 telefonata
potenzjali kull xahar, li minnhom il-hotline Ungeriż, Kék Vonal jista’ jwieġeb
madwar 6-7 kull xahar.
Is-sena l-oħra,
il-116000 wera xi jsarraf f’każ transkonfinali ta’ ħtif
tat-tfal mill-ġenituri. Fil-Belġju, missier ħa l-bniet
tiegħu tal-etajiet ta’ sebgħa, għaxra u erbatax-il sena u
ħbihom għal disa’ xhur u nofs, f’kundizzjonijiet ta’
faqar kbir u ta’ periklu. F’Settembru 2008, wara talba mill-hotlines
116000 Belġjani u Portugiżi għat-tfal mitlufin,
l-aħbarijiet ta’ filgħaxija fuq l-istazzjon tat-TV Portugiż
RTP-TV fetħu b’appell għall-informazzjoni dwar dawn it-tfal
mitlufin u kkonkludew billi wrew il-116000 fuq l-iskrin kollu. Ftit minuti wara
x-xandira, il-każ ġie solvut. L-implimentazzjoni tal-116000 kullimkien
fl-Ewropa twassal biex il-kampanji ta’ tiftix u l-kooperazzjoni
internazzjonali jkunu eħfef u aktar effikaċi. Il-hotlines ikunu
jistgħu jaġixxu b’mod aktar ikkoordinat sabiex jiġu solvuti
l-każijiet transkonfinali fejn it-tfal jisparixxu.
L-implimentazzjoni taż-żewġ numri l-oħra,
il-116111 (numru biex it-tfal iċemplu għall-għajnuna) u
l-116123 (linji ta' appoġġ emozzjonali), li ġew
riżervati f'Ottubru 2007, ukoll miexja sew. 
Sittax-il Stat Membru (il-Bulgarija, ir-Repubblika Ċeka,
il-Ġermanja, id-Danimarka, l-Estonja, il-Greċja, il-Finlandja,
l-Ungerija, l-Irlanda, il-Latvja, l-Olanda, il-Polonja, il-Portugall,
ir-Rumanija, l-Iżvezja u s-Slovakkja) allokaw il-11611, filwaqt li
s-sena l-oħra dawn kienu jgħoddu għaxra biss. L-allokazzjoni
tan-numri għaddejja f’żewġ pajjiżi (Ċipru u
Spanja). Filwaqt li s-sena l-oħra l-116111 kien jaħdem biss
fl-Ungerija, issa dan qed jopera f’disa’ Stati Membri
(ir-Repubblika Ċeka, il-Ġermanja, id-Danimarka, l-Estonja, l-Ungerija,
il-Polonja, il-Portugall, ir-Rumanija, is-Slovakkja) u dalwaqt se jkun qed
jopera f’ħames pajjiżi oħra (il-Greċja, il-Finlandja,
l-Irlanda, il-Latvja u l-Iżvezja). 
Il-116123, il-hotline tal-appoġġ emozzjonali, ġie assenjat
lill-operaturi tal-linji tal-għajnuna f’seba’ Stati Membri
(l-Awstrija, il-Ġermanja, il-Finlandja, l-Irlanda, l-Olanda,
l-Iżvezja, is-Slovenja). L-allokazzjoni tan-numri għaddejja
f’Ċipru. Il-116123 jaħdem fl-Awstrija u dalwaqt se jibda jopera
fi tliet pajjiżi oħra (il-Ġermanja, l-Iżvezja u
s-Slovenja).
F’Lulju
li għadda, rapport tal-progress mill-Kummissjoni wera li l-Istati Membri
sa issa ftit għamlu sforzi biex jinfurmaw lill-fornituri potenzjali
tas-servizzi dwar in-numri 116, u appella biex jimpenjaw irwieħhom
aktar (IP/08/1129)..
B’mod partikolari, l-Istati Membri jistgħu jħaffu l-pass billi
jipprovdu lill-fornituri potenzjali tas-servizzi, li s-soltu ftit ikunu jafu
dwar kwistjonijiet tat-telekomunikazzjoni, bi gwida dwar kif jingħatalhom
in-numru, u jagħtuhom punt ta' kuntatt wieħed ġewwa Ministeru jew
awtorità regolatorja nazzjonali. 
Sfond
F'Lulju 2006,
il-Kummissjoni Ewropea pproponiet li tirriżerva numru komuni tat-telefown
għar-rappurtar ta’ tfal mitlufin (116000) u ieħor biex it-tfal
ikunu jistgħu jċemplu għall-għajnuna (116111). Dan isegwi
l-adozzjoni tal-istrateġija tal-UE dwar id-drittijiet tat-tfal (IP/06/927).
Fil-15 ta' Frar 2007 u fit-30 ta' Ottubru 2007 rispettivament, il-Kummissjoni
ddeċidiet li tirriżerva l-116000 (IP/07/188)
u l-116111 fl-Istati Membri kollha. Id-deċiżjoni torbot
lill-pajjiżi tal-UE li jagħmlu pubblikament disponibbli "in-numri
116", iżda ma tobbligahomx jassenjaw in-numri lil fornitur tas-servizzi jew
biex jiżguraw il-forniment tas-servizzi. 
Aktar tagħrif dwar il-116: 
http://ec.europa.eu/information_society/policy/ecomm/current/pan_european/index_en.htm