IP/09/730
Brussell, 11 ta' Mejju 2009Il-Presidenti tal-Kummissjoni u
tal-Parlament jiddiskutu kontribuzzjonijiet etiċi għall-governanza
Ewropea u ekonomika globali mal-mexxejja tal-fidi EwropejIllum madwar għoxrin rappreżentant
ta’ livell għoli tal-Kristjaneżmu, tal-Ġudaiżmu u
tal-Iżlam fl-Ewropa nġabru fil-kwartieri tal-Kummissjoni fuq stedina
tal-President tal-Kummissjoni Ewropea, José Manuel Barroso, għal
djalogu informali mal-UE. Il-laqgħa kienet ippreseduta
b’mod konġunt mill-President tal-Kummissjoni Barroso u mill-President
tal-Parlament Ewropew Hans-Gert Pöttering. Il-laqgħa ta’ din
is-sena ffokat fuq sfida Ewropea u globali kbira: Il-kriżi ekonomika u
finanzjarja u l-kontribuzzjonijiet etiċi għal governanza Ewropea u
ekonomika globali.
Din kienet il-ħames laqgħa annwali tal-kapijiet
tal-istituzzjonijiet tal-UE mal-mexxejja reliġjużi. L-inizjattiva
kienet tnediet mill-President Barroso fl-2005.
Din is-sena, id-diskussjonijiet kienu kkonċentrati fuq "Il-kriżi
ekonomika u finanzjarja: Il-kontibuzzjonijiet etiċi għal governanza
Ewropea u ekonomika globali". Il-President Barroso ddikjara: "Hekk kif
tkompli għaddejja l-kriżi finanzjarja u ekonomika, dejjem qed jidher
ċar li wasal il-mument li ssir rikonċiljazzjoni bejn il-governanza
ekonomika u l-valuri etiċi fundamentali li fuqhom kien imsejjes
il-proġett Ewropew matul dawn l-aħħar 50 sena. Il-Kummissjoni
ħadet inizzjattivi importanti f’dan ir-rigward, speċjalment
fir-regolamenti tas-suq finanzjarju, bil-għan li tkun imsaħħa
r-responsabbiltà u s-sostenibbiltà fl-ekonomiji tagħna.
Il-President tal-Parlament Ewropew, Hans-Gert Pöttering, saħaq:
"Dawn huma żminijiet ta’ sfidi ekonomiċi enormi
għaċ-ċittadini Ewropej u għall-Unjoni Ewropea. Huma fi
żminijiet bħal dawn li l-Ewropa bħala komunità msejsa fuq
il-valuri, u l-prinċipju prinċipali tal-UE tas-solidarjetà,
jeħtieġ li jitpoġġa fuq quddiem nett. Is-soluzzjonijiet
komuni li qed infittxu jeħtieġ li jkunu ankrati fid-dinjità umana
u li jiġi żgurat li l-oqsma kollha tas-soċjetà jkunu
mħarsa: Il-kontribuzzjoni tar-reliġjonijiet u tal-knejjes hi
kruċjali biex dan isir. Ta' sikwit huma jkunu mpenjati f'ħidma b'risq
il-membri l-aktar vulnerabbli tas-soċjetà tagħna."
Il-parteċipanti fil-laqgħa inkoraġġew l-isforzi tal-UE
biex tkun ikkoordinata, stimulata u ggwidata azzjoni biex
issaħħaħ ir-regolament finanzjarju, tqajjem mill-ġdid
l-ekonomija u tieħu azzjoni għall-impjiegi fl-Ewropa u madwar id-dinja
kollha. Huma saħqu wkoll dwar il-ħtieġa li jiġi żgurat
li l-ġustizzja soċjali tibqa’ fuq quddiem nett fit-tfassil
tal-politika u fakkret li f’mument meta l-qagħad u l-faqar
qegħdin dejjem jiżdiedu għal-livelli inkwetanti,
is-soċjetajiet tagħna għandhom ikunu kapaċi jaġixxu
flimkien fl-iżvilupp u fl-implimentazzjoni ta' miżuri konkreti biex
jittaffew l-effetti tal-kriżi fuq iċ-ċittadini.
Fl-aħħar nett huma saħqu fuq l-impenn tagħhom biex
jgħinu fil-qawmien mill-ġdid tas-sens ta’ solidarjetà fost
l-Ewropej kollha ta’ kull twemmin u konvinzjoni u li tkun ispirata aktar
etika fl-imġiba tal-operaturi finanzjarji u ekonomiċi.
Lista tal-parteċipanti: Ara MEMO/09/227