IP/09/1261  Brussell, l-1 ta’ Settembru 2009 Il-kompetizzjoni tat-tradutturi żgħażagħ tal-UE tidħol fit-tielet sena tagħha  Xorti tajba għat-tielet darba fil-kompetizzjoni tal-Kummissjoni għal tradutturi ¿għa¿agħ Illum tibda t-tielet kompetizzjoni Juvenes Translatores għall-iskejjel sekondarji tal-UE bil-ftuħ tal-perjodu ta’ reġistrazzjoni  “Juvenes Translatores”, li bil-Latin tfisser “tradutturi żgħażagħ”, se jkollhom il-possibbiltà li jipprovaw jittraduċu test f’lingwa tal-għażla tagħhom u jirbħu premju.  Din il-kompetizzjoni li dejjem qed issir iżjed popolari se żżomm l-istess stil li ġie ppruvat li kien ta’ suċċess fit-tnejn ta’ qabel.  L-iskejjel sekondarji kollha li jixtiequ jipparteċipaw jistgħu jirreġistraw mill-1 ta’ Settembru sal-20 ta’ Ottubru.   ”Kompetizzjoni li bdiet bħala proġett bi prova żviluppat f’avveniment tant mistenni tas-sena skolastika”, skont il-Kummissarju għall-Multilingwiżmu, Leonard Orban.  “L-għan ta’ din il-kompetizzjoni hu li l-istudenti jingħataw l-opportunità li jużaw il-kapaċitajiet tal-lingwa li jkunu tgħallmu, biex jipprovaw “jaħdmu” bħala tradutturi, u biex titqajjem kuxjenza tal-arti tat-traduzzjoni.  Ir-rispons mill-iskejjel u l-parteċipanti fil-kompetizzjonijiet ta’ qabel juri li l-miri kienu ntlaħqu.  “Aħna kuntenti b’mod partikolari li wħud mir-rebbieħa llum qed jistudjaw it-traduzzjoni l-università”, qal il-Kummissarju Orban.  Fl-ewwel fażi, skejjel sekondarji mill-Istati Membri kollha huma mistiedna biex jirreġistraw pemezz tal-formola tal-applikazzjoni onlajn disponibbli fil-websajt tal-kompetizzjoni  http://ec.europa.eu/translatores   Għadd ta’ skejjel minn kull Stat Membru li jkunu rreġistraw se jintgħażlu b’mod każwali mill-kompjuter .  Minħabba li n-numru ta’ skejjel huwa limitat, il-bażi għall-għażla hu l-għadd tal-voti li kull Stat Membru għandu fil-Kunsill tal-Unjoni Ewropea mmultiplikat bi tnejn (ara t-tabella hawn taħt).          Franza, il-Ġermanja, l-Italja, ir-Renju Unit   58     Il-Polonja, Spanja   54     Ir-Rumanija   28     L-Olanda   26     Il-Belġju, ir-Repubblika Ċeka, il-Greċja, l-Ungerija, il-Portugall   24     L-Awstrija, il-Bulgarija, l-Iżvezja   20     Id-Danimarka, il-Finlandja, l-Irlanda, il-Litwanja, is-Slovakkja   14      Ċipru, l-Estonja, il-Latvja, il-Lussemburgu, is-Slovenja      8      Malta   6      Fit-tieni fażi, kull skola għandha tressaq l-ismijiet ta’ mhux aktar minn ħames studenti li twieldu fl-1992 .  Fl-istess ħin, l-istudenti għandhom jagħżlu l-lingwa li se jittraduċu minnha u għal-liema lingwa biħsiebhom jittraduċu.  L-għażla hija libera minn kwalunkwe waħda fost it-23 lingwa uffiċjali tal-UE (pereżempju, mill-Pollakk għar-Rumen jew mill-Malti għall-Finlandiż).  Il- kompetizzjoni se ssir fl-24 ta’ Novembru 2009 , bit-traduzzjonijiet li se jsiru fl-istess ħin fl-Istati Membri kollha taħt is-superviżjoni tal-iskejjel.  Il-kontestanti se jkollhom sagħtejn biex jittraduċu test mibgħut lill-iskejjel ftit qabel tibda l-kompetizzjoni.  Il-kontestanti jistgħu jużaw id-dizzjunarji, iżda l-ebda mezz elettroniku.   Wara l-kompetizzjoni, it-traduzzjonijiet se jkunu kkoreġuti minn panel li jikkonsisti fi tradutturi professjonali mid-Direttorat Ġenerali għat-Traduzzjoni tal-Kummissjoni, u l-ġurija tal-kompetizzjoni se tagħżel l-aħjar traduzzjoni minn kull Stat Membru.   Ir-rebbieħa kollha se jiġu mistiedna għal ċeremonja ta’ premjazzjoni ġewwa Brussell fil-preżenza tal-Kummissarju Ewropew għall-Multilingwiżmu.  Waqt il-mawra tagħhom fi Brussell ir-rebbieħa se jsiru jafu lil xulxin u se jiltaqgħu wkoll ma’ għadd ta’ tradutturi tal-UE.  Is-Sit tal-Juvenes Translatores:   http://ec.europa.eu/translatores   Il-lingwi fl-UE:    http://europa.eu/languages/mt/home    Id-DĠ għat-Traduzzjoni:    http://ec.europa.eu/dgs/translation/