IP/09/362
Brussell, 6 ta' Marzu 2009L-ue, l-Indja, it-tnejn bi 23 lingwa
uffiċjali, jiffirmaw dikjarazzjoni flimkien dwar
il-multilingwiżmuIllum, is-Sur Leonard Orban se jiffirma
Dikjarazzjoni Bi Sħab dwar il-multilingwiżmu mal-Gvern tal-Indja,
rappreżentat mill-Onor Ministru tal-Istat is-Sinjura
Daggubati Purandeshwari. B'din id-Dikjarazzjoni l-Kummissjoni Ewropea u l-Gvern
tal-Indja qed jimmiraw li jsaħħu l-kooperazzjoni u d-djalogu
tagħhom dwar temi ewlenin, fosthom id-diversità lingwistika u
d-djalogu interkulturali; l-impatt tal-lingwi fuq il-kapaċità
għall-impjieg, il-kompetittività tan-negozju u l-koeżjoni
soċjali; it-tagħlim tal-lingwi tul il-ħajja; teknoloġiji
ġodda għat-tagħlim tal-lingwi; u terminoloġija.
"L-esperjenza tal-Indja f'li tlaħħaq mad-diversità
lingwistika hija unika fid-dinja u nemmen li l-UE u l-Indja jistgħu
jitgħallmu mingħand xuxlin f'dan il-qasam," qal Leonard Orban,
il-Kummissarju Ewropew għall-Multilingwiżmu.
Din id-Dikjarazzjoni
bi Sħab qed issegwi s-Samit bejn l-UE u l-Indja li sar f'Marsilja
fid-29 ta' Settembru 2008, fejn il-mexxejja tal-UE u l-Indja
kkommettew ruħhom li jiżviluppaw djalogu dwar il-promozzjoni
tal-lingwi, id-djalogu interkulturali u l-multilingwiżmu. 
L-ewwel pass lejn dan id-djalogu nkiseb f'Diċembru 2008
bil-konferenza dwar "Il-Multilingwiżmu u d-Djalogu Kulturali
fil-Globalizzazzjoni" li sar fi New Delhi, l-Indja, fil-kuntest tas-Sena Ewropea
tad-Djalogu Interkulturali 2008. Il-Konferenza kienet organizzata bi sħab
mill-Kummissjoni Ewropea, l-Ambaxxata Franċiża, taħt
il-Presidenza tal-Unjoni Ewropea, il-Kummissjoni Nazzjonali Indjana dwar
l-Għerf u l-Unjoni Ewropea tal-Istituti Nazzjonali għall-Kultura
(EUNIC-India Cluster). L-Università ta' Delhi għoġobha tospita
l-Konferenza fil-bini tagħha. Għal aktar informazzjoni dwar
il-Konferenza jekk jogħġbok ara 
http://ec.europa.eu/education/languages/news/news3134_en.htmB'popolazzjoni ta' madwar 1.1 biljun ruħ, l-Indja tirrappreżenta
eżempju uniku ta' diversità etnika, soċjokulturali u
reliġjuża li ġġib magħha diversità lingwistika
tassew rikka. Skont ir-Rapport taċ-Ċensiment 2001, hemm
29 lingwa mitkellma minn aktar minn miljun kelliem nativ, 122 lingwa
b'mill-inqas 10 000 nies jitkellmuhom u 234 lingwa oħra li huma
mitkellma minn għadd żgħir ta' nies. Il-Kostituzzjoni Indjana
tiddikjara li l-Ħindi huwa l-lingwa uffiċjali tal-unjoni.
L-Ingliż jista' jintuża għal finijiet uffiċjali u
l-pajjiż għandu 22 lingwa reġjonali uffiċjali. Din
id-diversità lingwistika rikka ilha fatt tal-ħajja tul l-istorja
tal-Indja u hija meqjusa lokalment bħala waħda pjuttost naturali.
Din is-similarità fil-qasam lingwistiku mal-Unjoni Ewropea tagħmel
lill-Indja interlokutur privileġġjat għall-Ewropa fil-qasam
tal-multilingwiżmu. Din id-Dikjarazzjoni bi Sħab tagħti lok
għal dibattitu regolari u skambju ta' prattiċi tajba.